Saka Punjering Panguripan (1)
liwat sadhuwuring ayang-ayang
aku weruh glibeting si gatholoco
mlebu ronge si menco
liwat ing sandhuwuring ayang-ayang
aku krungu surake si jaka lodang
ngelemke sega wadhang
menyang ngendi paranku
menyang ngendi playuku
urut ilining banyu wudu
Saka Punjering Panguripan (2)
pandhom kang tansah mubeng seser
kaya dene klibate paser
gandewa kang manjing panah pusaka
kemelon ing dhuwuring iga
ya gene sliramu ora percaya
urip iki dudu ayang-ayang mega?
Saka Punjering Panguripan (3)
kasampurnan kang luwih sampurna
dununge ora na pasar bawera
uga ora na ing telenging kutha
kang mripat kaya watu kemlasa
dudu iki, dudu ika
awit ika lan iki
awit iki lan ika
: iki – ika, ika – iki
tampanana jiwa kang umop kaya
obyaking samodra
tampanana jiwa kang ngoyot kaya
banyu bune akasa
endhek dhuwure graita
ana ing slira
Surabaya, 31 Mei 1984
Sumber: Antologi Puisi Jawa Modern Jawa Timur 1981-2008 (2011)
Puisi: Saka Punjering Panguripan
Karya: Suripan Sadi Hutomo
Biodata Suripan Sadi Hutomo:
- Suripan Sadi Hutomo lahir pada tanggal 5 Februari 1940 di Ngawen, Blora.
- Suripan Sadi Hutomo meninggal dunia pada tanggal 23 Februari 2001 di Surabaya.